我有一個好特別嘅嘔血媽。嘔血媽係正宗香港人，但係自己陀B冇戒口，生完亦冇坐過月。佢生BB時， 廿幾歲頭非常年輕。生完第二日即刻掃街食煎釀三寶。佢亦唔覺得佢坐月佢身子會變差。我呀婆亦聽聞唔坐月。所以嘔血媽對我要大肚戒口同埋坐月呢D舉動，覺得非常稀奇，雖然我知佢好愛我好錫我但係佢控制唔到身體自然反應要時不時反我白眼。🙄🙄🙄
帶定頭盔先，戒口呢D冇話啱定錯，我想咁做等自己安心啲啫。唔好問我有冇科學根據，唔好問點解你係醫生你都要做～～ 其實你網上Search，總會有人話呢樣食得但係第二個就話果樣唔食得。呢個中醫咁講，嗰個營養師又話乜乜乜喎。所以自己衡量，自己Filter過，覺得自己體質或者平時生活習慣係啲乜嘢就自己揀戒啲乜嘢。
Any肥，由於我自己想陀得好小心，我能力範圍內戒到嘅就會戒（偷食薯片朱古力檸檬茶嗰啲冇辦法啦～～～～）。好似係五個禮拜嘅時候食錯野，一路宮縮痛到我凌晨三四點都瞓唔到。嚇死我以為保唔住個胎，第二日即刻要去搵同學仔攞啲Progesterone藥救急。
之後食嘢當然更加謹慎。但係嘔血媽冇任何概念大肚婆要點戒口，所以有時返娘家食飯，真係冇啖好食。白菜、蟹叫我照食。燒鵝、牛又想夾兩舊俾我食。沙律、雪糕、鰻魚、煎炸野等等問點解我唔食？
到七個月話聽人講要食啲嘢清胎毒，想煲綠豆沙、買西瓜等等。我話想保住孖B唔好咁快出嚟，費事早產，等佢哋喺入面耐啲儲肥啲。但係第二日佢整左木瓜湯比我飲⋯⋯😑😑😑
我每餐要打醒十二分精神，望下今晚食乜餸。自己唔識又再上網搵吓食唔食得。有時淨係會得菜心同白飯食得。我冇營養不良都幾叻哈哈！
下篇先寫坐月～～～
***
厚顏無恥嘅我，叫D朋友仔過嚟探BB唔好送衫嗰啲唔等洗野。送奶粉就得啦哈哈哈哈！
#奶粉山
#4日KO一罐
Search